fynhrethibusnes.gov.uk/cymru Gwefan swyddogol y Llwodraeth
Cwestiynau a ofynnir aml
Beth yw trethi busnes?
Trethi busnes yw’r ffordd y mae busnesau a deiliaid eraill eiddo annomestig yn cyfrannu at gostau gwasanaethau awdurdodau lleol.
Beth yw rhestr ardrethu?
Mae gwerth trethadwy eich eiddo, a gwerth yr holl eiddo busnes eraill, yn ymddangos mewn rhestrau ardrethu a gyhoeddir gan Asiantaeth y Swyddfa Brisio (VOA). Daeth y rhestrau presennol i rym ar 1 Ebrill 2005 a byddant yn para am bum mlynedd. Mae rhestrau ardrethu ar gael yn swyddfeydd VOA ac ar-lein
Beth yw ailbrisio?
Bydd Asiantaeth y Swyddfa Brisio yn cynnal ailbrisiad, neu ailasesiad, o’r holl werthoedd trethadwy bob pum mlynedd er mwyn sicrhau eu bod yn cynnwys y wybodaeth ddiweddaraf ac yn adlewyrchu newidiadau yn y farchnad eiddo. Daeth yr ailbrisiad mwyaf diweddar i rym ar 1 Ebrill 2005.
Beth yw prisiad cryno?
Mae’r prisiad cryno yn cael ei lunio gan Asiantaeth y Swyddfa Brisio ac mae’n esbonio sut y cyfrifwyd gwerth trethadwy eich eiddo busnes. rhagor...
Beth yw gwerth trethadwy?
Mae gwerth trethadwy eich eiddo yn ffigwr a seiliwyd ar asesiad proffesiynol o rhent blynyddol eiddo os byddai ar gael i’w rentu ar y farchnad agored ar ddyddiad prisio penodol. rhagor...
Sut mae fy ngwerth trethadwy yn cael ei gyfrifo?
Mae Asiantaeth y Swyddfa Brisio (VOA) yn casglu cymaint o dystiolaeth ag y bo modd o’r rhent go iawn a delir am eiddo ledled Cymru. Bydd VOA yn defnyddio’r dystiolaeth hon, ynghyd â gwybodaeth arall, i bennu lefelau gwerth rhentu sy’n briodol mewn lleoliad penodol ar gyfer gwahanol fathau o eiddo. rhagor...
Ai’r gwerth trethadwy yw’r cyfanswm y byddaf yn gorfod ei dalu fel trethi?
Na. Mae’r gwerth trethadwy yn sail ar gyfer y broses o gyfrifo eich bil trethi. Caiff ei luosi yn erbyn ffactor a bennir gan Lywodraeth Cynulliad Cymru bob blwyddyn o’r enw y lluosydd. rhagor...
Sut alla i ddarganfod beth yw fy ngwerth trethadwy?
Caiff eich gwerth trethadwy ei argraffu yn eich prisiad cryno neu, os nad oes gennych un o’r rhain, ar eich bil trethi. Gallwch weld eich gwerth trethadwy ar-lein trwy droi at www.voa.gov.uk neu gallwch holi eich Swyddfa Brisio leol amdano.
Pryd fyddaf yn cael prisiad cryno?
Cyhoeddir prisiadau cryno os bydd gwerth trethadwy eich eiddo yn cael ei ddiwygio.
Beth os bydd manylion fy eiddo yn y prisiad cryno yn anghywir?
Dylech ddiwygio unrhyw fanylion anghywir a dychwelyd y prisiad cryno i’r Swyddfa Brisio a anfonodd y prisiad atoch. rhagor...
Beth yw parth adwerthu?
Defnyddir parthau adwerthu, neu drefniadau 'dynodi parthau', fel ffordd o bennu gwerth trethadwy siop nodweddiadol. rhagor...
Pam nad yw fy ngwerth trethadwy yn debyg i’r rhent yr ydw i’n ei dalu mewn gwirionedd?
Y gwerth trethadwy yw’r asesiad o’r rhent y byddai modd gofyn amdano fel rhent blynyddol os byddai ar gael ar y farchnad agored ar ddyddiad penodol. Gallai’r gwerth trethadwy fod yn wahanol i’r rhent yr ydych yn ei dalu am nifer o resymau – er enghraifft, efallai y cytunwyd ar eich rhent ar adeg gwahanol.
Beth ddylwn ei wneud os na fyddaf yn cytuno â’m gwerth trethadwy?
Os yw’r ffeithiau am eich eiddo yn gywir ond os ydych yn anghytuno â’ch gwerth trethadwy, gallwch gysylltu â VOA ar 0845 602 1507. Os nad ydych yn fodlon o hyd, ar ôl cael ateb i’ch cwestiynau, gallwch apelio. rhagor...
Pryd fyddaf yn cael y bil?
Bydd eich awdurdod lleol yn anfon eich bil trethi atoch rywbryd rhwng mis Chwefror a mis Ebrill bob blwyddyn. Efallai y cyhoeddir bil newydd os bydd eich gwerth trethadwy yn cael ei ddiwygio.
Beth os na fyddaf yn gallu fforddio talu’r bil?
Dylech gysylltu â’ch awdurdod lleol yn syth os ydych yn cael anhawster i dalu eich taliadau bil trethi. Efallai y bydd yn gallu rhoi cymorth i chi ond mae’n rhaid i chi drafod hyn gydag ef.
A oes unrhyw eiddo annomestig wedi’u heithrio o’r drefn talu trethi busnes?
Oes, ceir rhai eithriadau fel:
- Tir ac adeiladau amaethyddol
- Ffermydd pysgod
- Eglwysi a mannau addoli eraill
- Carthffosydd
- Parciau cyhoeddus
- Eiddo penodol a ddefnyddir ar gyfer pobl anabl
- Angorfeydd siglo ar gyfer cychod
Sut ddylwn apelio yn erbyn fy ngwerth trethadwy?
Gallwch apelio yn uniongyrchol i’ch Swyddfa Brisio leol – gall roi’r ffurflen angenrheidiol i chi – neu gallwch aelio ar-lein trwy droi at www.voa.gov.uk. Gallwch wneud hyn yn rhad ac am ddim. Neu, efallai y byddwch yn dymuno cysylltu ag asiant ardrethu er mwyn cael cyngor ynghylch apelio ac i ofyn iddynt ddelio â’r apêl ar eich rhan. Os byddwch yn dewis gwneud hyn, fe’ch cynghorir yn gryf i gyflogi asiant sy’n aelod o un o'r cyrff proffesiynol a nodir yn yr adran Cysylltiadau.